Miragwàn, 14 septanm 2024 – Yon gwo trajedi frape vil Miragwàn nan samdi sa a, ki make tout moun nan zòn nan. Omwen 17 moun mouri ak plizyè dizèn lòt blese grav aprè eksplozyon yon kamyon sitèn ki te pote gaz. Aksidan an fèt nan zòn Kalbasye, kote kamyon an chavire, epi moun nan katye a te kouri al pran gaz la anvan sitèn nan te eksploze, ki fè tout bagay pran dife.
Apre evenman tris sa a, Premye Minis Ayiti a, Dr Garry Conille, te rive sou plas kote dram lan te pase pou l te pote solidarite l bay fanmi viktim yo ak moun ki blese yo. Li te fè konnen ak anpil tristès:
« Sa mwen sot wè la a se yon bagay terib. »
Pandan vizit solidarite sa a, chèf gouvènman an pa t sèlman vin di konpasyon li, li te pran desizyon imedya pou ede moun ki te blese yo. Genyen nan blese yo ki te deplase imedyatman pa elikoptè al pran swen nan lopital nan Pòtoprens, pandan lòt yo te resevwa premye swen sou plas nan men ekip medikal ki te deja mobilize.
Premye Minis Conille te felisite e remèsye pwofesyonèl sante yo ki te mobilize rapidman pou ede viktim yo. Li te asire fanmi yo ke gouvènman an ap la pou yo, e li bay garanti ke Ministè Sante Piblik ansanm ak lòt enstitisyon konsène yo pral fè tout sa yo kapab pou bay viktim yo pi bon swen posib.
Tragedi ki rive nan Miragwàn pa premye dezas konsa nan peyi a. Ayiti, ki deja ap lite ak enstabilite politik ak ekonomik, souvan fè fas ak aksidan ki gen rapò ak transpò gaz ak pwoblèm sekirite sou wout. Eksplozyon kamyon sitèn yo, kote moun ap kouri al pran gaz, tounen yon pwoblèm grav ki montre kriz enèji ak mank regilasyon nan transpò materyèl danjere yo.
Pou moun Miragwàn yo, sa se yon gwo chòk. Anplis pèt lavi moun, plizyè motosiklet ak machin te boule nèt nan dife a, e vil la leve maten sa a ak dèy ak kesyon san repons.
