Dimanch 25 dawout 2024 pase a, gwoup Zafèm te fè Pòtoprens tranble ankò ak yon pèfòmans ki make lespri tout moun nan Ritz Kinam, nan Petyonvil. Malgre lapli ki t ap tonbe san rete e ki te lakòz yon ti reta nan kòmansman sware a, fanatik yo te rete detèmine, e sa te menm ogmante eksitasyon yo.
Vedèt gwoup la, Reginald Cangé ak Dener Céide, te fè piblik la reviv ak yon pèfòmans prèske twa èdtan, nèg yo melanje ritm ki antrenan yo ak bèl mizik ki chaje ak emosyon. Sal la te kraze lè yo te chante gwo siksè yo tankou « Dlo Dous » ak pati anbyans nan « n ap bwè », ki te fè Ritz Kinam tounen yon veritab sèn fèt, kote tout moun t ap danse ak chante ansanm.
Alchimi ki egziste ant Reginald ak Dener te klè, e enèji pozitif yo a te fasil transmèt bay fanatik yo. Sware sa a montre klèman ke Zafèm se pa sèlman yon gwoup mizikal, men yon fenomèn ki pote chalè ak kè kontan bay tout moun ki renmen mizik yo.
