Madi 27 out 2024 la, pandan yon operasyon espesyal ke Polis Nasyonal d Ayiti (PNH) te mennen nan zòn Bèlè ak Solino, 3 polisye nan inite SWAT te sibi blesi lejè. Daprè yon nòt ki parèt sou paj ofisyèl Facebook PNH, yo fè konnen ke eta sante polisye yo konsidere kòm estab, epi yo ap resevwa swen medikal nesesè pou retabli yo.
Operasyon an, ki enplike plizyè inite espesyalize nan PNH, te fèt ak sipò yon fòs miltinasyonal Sekirite (MSS). Bi operasyon sa a se demantle baz gang ki pran kontwòl zòn sa yo depi kèk tan, sa ki te vin menase sekirite ak lapè rezidan ki abite nan katye sa yo.
Nòt la kontinye pou mande popilasyon an pou yo rete kalm pandan operasyon ap fèt yo. PNH asire ke operasyon yo ap mennen avèk pwofesyonalis e respè pou dwa moun, epi li mande kolaborasyon ak konfyans nan men sitwayen yo pou ede retabli lapè ak sekirite nan kominote a. Lapolis pwomèt tou pou bay plis detay sou rezilta operasyon yo nan jou kap vini yo.
