DIREKSYON IMIGRASYON AK EMIGRASYON (DIE) fè konnen, nan yon kominike ki sòti 16 out 2024, ke pwodiksyon nouvo paspò yo pral sispann tanporèman apati lendi 19 out 2024. Desizyon sa a pran pou ka rezoud kantite dosye paspò ki bloke nan sistèm nan.
Pandan peryòd sispansyon an, DIE ap travay pou delivre 10 154 paspò ki deja an atant yo. Mezi sa a fèt pou asire sèvis la vin pi rapid ak pi efikas nan lavni, dapre sa enstitisyon an vle reyalize.
Yo mete sou pye yon ekip espesyal pou akselere rezolisyon dosye ki deja an atant yo. DIE ap kontinye enfòme popilasyon an sou pwogrè travay yo atravè chanèl ofisyèl Ministè Enteryè a ak platfòm dijital li yo.
Stéphane Vincent, ki fèk nonmen kòm Direktè Imigrasyon ak Emigrasyon 9 out 2024 la, eksprime angajman li pou amelyore kalite sèvis yo epi respekte dwa sitwayen ayisyen yo, kit an Ayiti, kit lòt bò dlo, pandan l ap swiv direktiv gouvènman an pou konbat koripsyon epi fè refòm nan administrasyon an.
