Daprè jounal Miami Herald, gouvènman ameriken an ap reflechi sou posiblite pou transfòme Misyon Multinasyonal Sipò Sekirite a (MMSS) ann Ayiti, ki anba dirijans peyi Kenya, an yon operasyon tradisyonèl pou kenbe lape Nasyonzini. Sa a fèt poutèt pwoblèm finansman ak mank ekipman pou misyon an, ki jiska kounye a, ap fonksyone ak anpil sipò finansye Etazini.
Yon responsab Konsèy Sekirite Nasyonal nan Lamezonblanch konfime ke Etazini, ansanm ak patnè yo, ap chèche diferan opsyon pou ranfòse misyon an epi asire ke MMSS ap kontinye bay Ayisyen yo sipò sou tèm long. Objektif la se kreye yon klima sekirite ki ka pèmèt eleksyon lib ak jis fèt.
Miami Herald fè konnen transfòmasyon sa a se yon rekonesans pou difikilte Etazini genyen pou jwenn kontribisyon volontè pou misyon an, ki koute anviwon 200 milyon dola chak sis mwa. Malgre kèk deklarasyon ki pale de pwogrè ki fèt depi sòlda kenyen yo rive, Ayiti toujou ap fè fas ak gwo defi sekirite.
Sepandan, pou yon misyon pou kenbe lape fèt, li ta dwe jwenn apwobasyon Konsèy Sekirite Nasyonzini. Gen anpil kesyon si tout manm pèmanan yo, espesyalman Lachin ak Larisi, pral soutni li. Apre vizit li an Ayiti, anbasadè Kanada nan Nasyonzini, Robert Rae, te deklare ke diskisyon dwe fèt pou wè kijan yo ka ranfòse misyon sekirite a. Li te ajoute ke yon misyon kenbe lape sanble pi bon repons pou sitiyasyon Ayiti a, men li rekonèt gen gwo baryè politik ki anpeche avansman.
Li enpòtan pou souliyen tou, kat ofisye kenyen te pale ak ajans Reuters kote yo te fè konnen ke pwoblèm nan peye polisye yo ak mank ekipman gravman afekte moral polisye kenyen yo ki deploye ann Ayiti. Sa vin difisil pou yo konfwonte gang ki byen ame yo.
