{"id":3759,"date":"2025-08-10T20:25:46","date_gmt":"2025-08-10T18:25:46","guid":{"rendered":"https:\/\/velipost.com\/?p=3759"},"modified":"2025-08-10T20:25:47","modified_gmt":"2025-08-10T18:25:47","slug":"ucateba-repiblik-dominiken-charlot-jocelyn-ap-anseye-etidyan-dominiken-pale-ak-ekri-kreyol-ayisyen","status":"publish","type":"post","link":"https:\/\/velipost.com\/?p=3759","title":{"rendered":"UCATEBA, Repiblik Dominik\u00e8n : Charlot JOCELYN ap anseye etidyan dominiken pale ak ekri krey\u00f2l ayisyen"},"content":{"rendered":"\n
Il\u00e9us PAPILLON
Prezidan Salon du Livre et des Arts du Grand Nord d'Ha\u00efti<\/pre>\n\n\n\n
Se yon bon nouv\u00e8l pou tout kreyolis, kreyat\u00e8, militan lang ak kilti ayisyen an, epi pou tout moun ki kw\u00e8 nan val\u00e8 lang krey\u00f2l la k\u00f2m zouti lespwa ak lyen sosyal. Lang krey\u00f2l la, ki se senb\u00f2l idantite p\u00e8p ayisyen an, kontinye simaye limy\u00e8 li pi lwen pase fwonty\u00e8 Ayiti, gras ak jef\u00f2 militan angaje tankou Charlot JOCELYN, yon sitwayen ayisyen ki soti nan vil P\u00f2mago, nan N\u00f2 istorik Ayiti.<\/p>\n\n\n\n
Depi k\u00e8k tan, Pwofes\u00e8 Charlot JOCELYN, yon Ayisyen pasyone de edikasyon, idantite ak kilti ayisyen an, ap anseye krey\u00f2l ayisyen nan Universidad Cat\u00f3lica Tecnol\u00f3gica de Barahona (UCATEBA), yon enstitisyon sipery\u00e8 ki chita nan sid Repiblik Dominik\u00e8n. Men sa ki f\u00e8 inisyativ sa depase yon senp kou lang : se paske se pa s\u00e8lman pale ak ekri krey\u00f2l pwofes\u00e8 Charlot ap anseye, men pwofes\u00e8 a ap louvri lespri el\u00e8v dominiken yo sou literati ayisy\u00e8n nan tou, sou kreyat\u00e8 nou yo, sou lespri kreyatif p\u00e8p ayisyen an.<\/p>\n\n\n\n
Nan klas li yo, el\u00e8v yo ap dekouvri ot\u00e8 krey\u00f2l, pow\u00e8t ak ekriven ki mete krey\u00f2l la nan mitan refleksyon yo sou sosyete, memwa ak kilti ayisyen an. Se yon b\u00e8l pon ki konstwi ant de p\u00e8p ki, malgre istwa difisil yo, gen anpil bagay yo ka pataje sou plan imanit\u00e8, sosyal ak kiltir\u00e8l.<\/p>\n\n\n\n
Sa f\u00e8 nou sonje pwoj\u00e8 \u00ab\u00a0Zile a \/ La Isla\u00a0\u00bb, an 2017, yon inisyativ liter\u00e8 ki te mete 40 pow\u00e8t ayisyen ak dominiken ansanm nan yon liv kolektif yo te ekri an krey\u00f2l ak an espany\u00f2l. Zanmi nou, Il\u00e9us PAPILLON se yonn nan ot\u00e8 z\u00e8v sila. Liv sa te eseye trase yon l\u00f2t lyen ki pa f\u00e8t ak w\u00f2ch ni fil babele, men ak mo, imajinasyon, lespri ak espwa.<\/p>\n\n\n\n
Jodi a, se twa pwofes\u00e8 ki mete men pou bay kou sa yo nan UCATEBA:
\u2022\u2060 \u2060Charlot JOCELYN,
\u2022\u2060 \u2060P\u00e8 Edvard JEUDY,
\u2022\u2060 \u2060P\u00e8 Nico SAINT-LOUIS,
twa Ayisyen angaje k ap pote flanm krey\u00f2l la vivan nan peyi vwazen an.<\/p>\n\n\n\n
Se pa ti jef\u00f2. Se pa ti j\u00e8s. Se yon jef\u00f2 istorik, kiltir\u00e8l ki merite tout resp\u00e8 ak ankourajman.<\/p>\n\n\n\n
Se pou sa n ap di Pwofes\u00e8 Charlot JOCELYN, atchaba!<\/p>\n\n\n\n
Il\u00e9us PAPILLON
Ekriven | Kreyolis
Prezantat\u00e8 emisyon N AP LI<\/p>\n\n    
\n\n\t\t\n